ԽԻՍՏ ԿԱՍԿԱԾՈՒՄ ԵՄ, ՈՐ ՔՊ ԿՈՒՍԱԿՑՈՒԹՅՈՒՆԸ ՀԱՐՄԱՐ ԿԳՏՆԻ, ՈՐ ՆԱ ՄՆԱ․ ԱԼԵՔՍԱՆՅԱՆԸ՝ ՀԱԿՈԲ ԱՍԼԱՆՅԱՆԻ ՄԱՍԻՆ

ՔՊ-ական պատգամավոր Հակոբ Ասլանյանը այսօր առավոտից սկանդալների մեջ է։ Պատգամավորը նախ հայտարարել էր, թե Հովիկ Աղազարյանի նկատմամբ «հալածանքներով» պայմանավորված՝ դադարեցնում է անդամությունը ՔՊ խմբակցությանը մեկ ամսով` մինչեւ պարզաբանումներ կստանա Աղազարյանի մեղավորության կապակցությանբ: ՔՊ գրասենյակից արձագանքեցին, որ մեկ ամսով խմբակցությանն անդամակցությունը սառեցնելու ընթացակարգ չկա` իրենք կքննարկեն Ասլանյանին հեռացնելու հարցը: Պարզ էր, որ սկսվեցին ճնշումները հերթական ՔՊ-ականի նկատմամբ:

Իսկ արդեն ժամեր անց Ասլանյանն իր ֆեյսբուքյան էջում հրապարակեց ՔՊ-ական, ԲՏԱ նախարար Մխիթար Հայրապետյանի հետ «պերեպիսկան» եւ իր մեղայականը, որ իր արտահայտությունները եղել են էմոցիոնալ վիճակում եւ, որ ինքը շարունակում է մնալ ՔՊ անդամ։ Զավեշտալին այն է, որ պատգամավորը «սքրինշոթով» էր մեղայականը տեղադրել, որից երեւում էր, որ տեքստը Մխիթար Հայրապետյանն է իրեն ուղարկել: Հետո` վերախմբագրեց եւ նկարի վերին հատվածը հեռացվեց, բայց արդեն, ինչպես ասում են, «բռնվել» էին եւ պարզ էր, որ Մխիթար Հայրապետյանը` ՔՊ-ի կողմից դեսանտ է իջեցվել եւ թելադրել, թե ինչ տեքստով մեղայական գա Ասլանյանը: 

Ասլանյանը մեր զանգերին չպատասխանեց, ՔՊ-ական պատգամավոր, ՔՊ վարչության փոխնախագահ Վահագն Ալեքսանյանից հետաքրքրվեցինք` ի՞նչ է կատարվում Հակոբ Ասլանյանի հետ, ի՞նչ է նշանակում՝ ժամանակավոր դադարեցնել համագործակցությունը ՔՊ-ի հետ, արդյո՞ք քննարկվում է Ասլանյանին կուսակցությունից հեռացնելու, մանդատից զրկելու հարցը։

«Առհասարակ չեմ հասկանում, թե ինչի մասին է խոսում, երբ ասում է՝ տեւական ժամանակով դադարեցնում եմ ՔՊ-ի հետ համագործակցությունը, այդ ինչ արտահայտություն է։ Այսինքն՝ կար Հակոբ Ասլանյան առանձին մարմի՞ն եւ ՔՊ կուսակցության հետ հուշագի՞ր, որ դադարեցնում է։ Ես չեմ կարողանում դա հասկանալ, ինձ թվում է՝ ինչ-որ չափով անադեկվատության խմբաքանակ է պետք դա հասկանալու համար։ Ադեկվատ լինելու պարագայում դա հասկանալը չափազանց դժվար է»,- նշեց նա։

Հակոբ Ասլանյանը, Ալեքսանյանի խոսքով՝ դեռ շարունակում է լինել ՔՊ-ական պատգամավոր, բայց այդ հարցն իրենք քննարկելու են։ «Այս պահին՝ դեկտեմբերի 11-ի դրությամբ, դեռ այո... Եթե ՔՊ կուսակցությունը հարմար կգտնի, որ նա մնա, ինչին շատ խիստ կասկածում եմ»,- շեշտեց ՔՊ վարչության փոխնախագահը՝ ստեղծված իրավիճակը որակելով մաքսիմալ անադեկվատ։ «Նմանատիպ հիմարության դոզա շատ վաղուց չէի տեսել», -նկատեց նա