Վենեսուելայում 6 օտարերկրացի է ձերբակալվել՝ երկրի նախագահի դեմ մահափորձ կազմակերպելու մեղադրանքով
Վենեսուելան հայտարարել է, որ ձերբակալել է վեց օտարերկրացու, այդ թվում՝ ԱՄՆ-ի ռազմածովային ուժերի զինծառայողի՝ երկիրը «ապակայունացնելու» նպատակով ենթադրյալ դավադրության մեղադրանքով, հաղորդում է CNN-ը:
Վենեսուելայի ներքին գործերի նախարար Դիոսդադո Կաբելյոն հայտարարել է, որ ենթադրյալ դավադրությունը կազմակերպվել է ԿՀՎ-ի կողմից և նպատակ ուներ սպանել երկրի առաջնորդ Նիկոլաս Մադուրոյին։
ԱՄՆ Պետդեպարտամենտը «կտրականապես կեղծ» որակումով հերքել է այդ պնդումը։
Շաբաթ օրը կայացած մամուլի ասուլիսում Կաբելյոն հրապարակել է զինծառայողի անունը՝ Ուիլյամ Ջոզեֆ Կաստանեդա Գոմես։ Կաբելյոն նշել է, որ հենց Գոմեսն է ղեկավարել գործողությունը։
Նախարարը տվել է նաև երկու այլ ձերբակալված ամերիկացիների անունները՝ Դեվիդ Էստրելլա և Ահարոն Բարեթ Լոգան: Նա հայտնել է, որ բացի ամերիկացիներից ձերբակալվել է Իսպանիայի երկու քաղաքացի՝ Խոսե Մարիա Բասոա Վալդովինոսը և Անդրես Մարտինես Ադասմեն և Չեխիայի քաղաքացի՝ Յան Դարմովզալը։ Վենեսուելայի իշխանությունները նաև առգրավել են ենթադրյալ դավադրության հետ կապված 400 միավոր ամերիկական հրացան, ասել է նա:
«ԿՀՎ-ն այս գործողության առաջնագծում է»,- հայտարարել է Կաբելյոն մամուլի ասուլիսի ժամանակ՝ պնդելով, որ դրան մասնակցել է նաև Իսպանիայի Ազգային հետախուզական կենտրոնը։
Ըստ նախարարի, գործողությունն ուներ «շատ հստակ նպատակներ՝ սպանել նախագահ Նիկոլաս Մադուրոյին» և Վենեսուելայի այլ բարձրաստիճան քաղաքական գործիչների, այդ թվում՝ իրեն և փոխնախագահին:
Պետքարտուղարությունը հերքել է այս հայտարարությունները։
ԱՄՆ Պետդեպարտամենտի մամուլի ծառայությունը հաստատել է, որ Վենեսուելայում ձերբակալվել է ԱՄՆ զինված ուժերի զինծառայողը, և որ գերատեսչությունը «տեղյակ է ԱՄՆ-ի ևս երկու քաղաքացիների ձերբակալման մասին չհաստատված տեղեկությունների մասին»:
«Մադուրոյին տապալելու դավադրության մեջ ԱՄՆ-ի մասնակցության մասին ցանկացած պնդում կտրականապես կեղծ է, - հավելել է խոսնակը:- Միացյալ Նահանգները շարունակում է աջակցել Վենեսուելայում քաղաքական ճգնաժամի ժողովրդավարական լուծմանը»։
Իսպանիայի արտաքին գործերի նախարարության աղբյուրը Reuters-ին հայտնել է, որ լրացուցիչ տեղեկություններ է պահանջել Վենեսուելայից:
«Իսպանիայի դեսպանատունը բանավոր նոտա է ուղարկել Վենեսուելայի կառավարությանը՝ հնարավորություն խնդրելով հանդիպել ձերբակալված քաղաքացիներին՝ նրանց ինքնությունը և քաղաքացիությունը ստուգելու համար և պարզելու, թե կոնկրետ ինչում են նրանք մեղադրվում», - Reuters-ին ասել է աղբյուրը:
Commentaires