Զելենսկին իր գրասենյակում պաշտոնների է նշանակել նախկին պաշտոնյաների
Ուկրաինայի նախագահ Վլադիմիր Զելենսկին մի քանի նշանակումներ է կատարել երկրի նախագահի գրասենյակում։ Պաշտոններ են ստացել նախկին պաշտոնյաները, հայտնում է РБК-Украина-ն՝ Ուկրաինայի նախագահի գրասենյակին հղումով։
Զելենսկին Անդրկարպատյան շրջանային վարչակազմի ղեկավարի պաշտոնից ազատել էր Վիկտոր Միկիտային։ Նա նշանակվել է նախագահի աշխատակազմի ղեկավարի տեղակալի պաշտոնում։
Նման պաշտոն է ստացել նաև ժամանակավորապես օկուպացված տարածքների վերաինտեգրման հարցերով նախկին նախարար Իրինա Վերեշչուկը։
Բացի այդ, Զելենսկին նշանակել է նախագահի երկու խորհրդականների՝ Դմիտրի Լիտվինին (հաղորդակցության գծով խորհրդական) և Ալեքսանդր Կամիշինին (ռազմավարական հարցերով խորհրդական): Վերջինս մինչև այս շաբաթ զբաղեցրել էր Ռազմավարական արդյունաբերության նախարարության ղեկավարի պաշտոնը։
Ավելի վաղ կադրային փոփոխություններ են տեղի ունեցել նաև Ուկրաինայի կառավարությունում։
Այսպես, փոխվել է ռազմավարական արդյունաբերության նախարարության ղեկավարը։ Նախկինում այն ղեկավարում էր Ալեքսանդր Կամիշինը, իսկ այժմ՝ Գերման Սմետանինը («Ուկրոբորոնպրոմի» նախկին ղեկավար)։
Նաև Իրինա Վերեշչուկն էր ազատվել վերաինտեգրման նախարարության ղեկավարի պաշտոնից։ Նախարարությունը ժամանակավորապես ղեկավարում էր նրա տեղակալը։
Դմիտրի Կուլեբան ազատվել էր արտաքին գործերի նախարարի պաշտոնից։ Նրա փոխարեն նշանակվել է Անդրեյ Սիբիգան։ Գործակալության աղբյուրների համաձայն, Կուլեբան կարող է նշանակվել Բրյուսելում դիվանագիտական աշխատանքի։
Comments